مش هيصبَّح
مش هيقول لي فين الجزمة أنا اتأخرت
ولا هكويله قميصه بسرعه لان شِلِّتُه تحت
مش هيبرطم وانا بديله العشرة جنيه
عارفين ليه؟
مش هيصفَّر تحت البيت ويقول لي انا طالع
عايزه بقاله؟
مش هيناكف في الشغاله
مش هيرُوح الدرس يراجع
عارفين ليه؟
مش هيداري سجارة شربها بباكو لبان
ولا هيجيب لاخواته جنان
ولا يتمحلس علشان عايز جينز جديد
ولا عاد هيأخَّر مواعيد
عارفين ليه؟
مش هيخبي شهادته الخايبه
ويمضي بدالي
ولا اقول له العيشه بقت صعبه
يقول وانا مالي
مش هيرد الكلمة بعشرة
بس انا صابرة
عارفين ليه؟
علشان شايله فقلبي حاجاته
كل شقاوته وابتساماته
كل ما اغمض عيني ببوسه
واما بفتّح عيني بشوفه
وسط صحابه ومستنيني
إدعولي لعنده يوديني
كان على عيني فراقك يابني
يا حبة عيني
كلمات أم شهيد من شهداء بورسعيد 