بجد مابقاش حد فاهم حاجة. الإستفتاء والدخول والخروج والكروت وكارنيهات الزائرين وستيكر السيارة والقصة لم تنتهي حتي الآن. المهم حد لاحظ إن في اي حاجة إتغيرت؟ هل خف الزحام؟ حد يعرف حد دفع تمن تذكرة توحد الله من اللي قالو لنا عليها؟ حد نزل السوق بع الفطار وعرف يركن عربيته من ماحد يقفل عليه وييجي يركب عادي جدا من غير مايرفع وشه فيك ويقول آىسف؟

 

إيه الحكاية؟ وماهي صعوبة تطبيق قواعد الدخول اللي صدعونا بيها. لغاية دلوقت ماحصلش اي حاجة والناس داخلة خارجة على مزاجها والمدينة كانت لاتطاق في الصيف. ودلوقت يطلب منا الجهاز أن نتوجه اليهم مرة اخري وتاخد رقم وتستني ساعتين عشان يدو لك كارت جديد بدل الستيكر القديم اللي ماكنش ليه اي لازمة لأن البوابات مفتوحة للكل عموما، والستيكر ده برضه حضرتك قعدت ساعتين مستنيه. طب بالذمة مش خسارة الفلوس والوقت اللى بيضيع ده؟ لو سمحتم لو حد فاهمة يفهم الباقي لماذا لم تطبق القواعد المتفق عليها ولماذا يغيروها الآن؟

 

الناس بتقول فيه ضغط من اصحاب المحلات والفود كورت علي الجهاز لعدم تطبيق قواعد الدخول وكأن سكان الرحاب مش مكفينهم (اللهم ولاحسد وكفاية الشبراوي)، بس الموضوع بجد اصبح لايطاق وعايزين نعرف حتفتحوا البوابات وللا حتقفلوها عشان الموضوع بقي بايخ قوي.