Rehaby Logo
السبت 20 رمضان، 1440 - 25 مايو، 2019

أحدث الأخبار:

عناوين الأخبار

شباب الرحاب.. كيف يعيش حياته؟

شباب الرحاب..كيف يعيش حياته؟ 


خروج وتهييس مع الأصحاب وانترنت تكملة السهرة بالليل حشيش وخمرة  وبنات وموسيقى وغنى وحفلات.. وفيهم من يسرق من كتر الفراغ 

المخدرات زي اللبان .. وساعات في المدرسة علشان اصطباحة الصبح..

الذهاب للجامعة .. نادر ، والدراسة إسراف.

حديقة الـ GUC حديقة حمراء.. وبلاش نتكلم

الخناقات فراغ وملل, شباب التجمع"الحبسجية" يرخموا على الشاب الحليوة بتاع الرحاب يجروا شكله, هب خناقة, ويا سلام لو عامل دماغ تبقى أحلى حاجة، ما أنت بتضرب ومش حاسس .. بس بتصحى ماتعرفش نفسك لما تبص في المرايه

الوجه الآخر لشباب الرحاب: طلاب ملتزمون..يدرسون ويعملون.. ويمارسون الرياضة

أ.د. صلاح عبد المتعال: أصابع الاتهام والمسؤولية في هذه المشكلة توجه للدولة والمجتمع أكثر منها للأسرة


تحقيق- سمية مصطفى

من هم شباب الرحاب؟ هل هم من نراهم يوميًا أمام المولات وفي "الفود كورت" يمضون أوقاتًا بلا هدف، أم الذين يقسمون أوقاتهم بين الدراسة والعمل، وممارسة رياضة ما؟.. هل طبعت الرحاب شبابها بطابع خاص أم أنهم متباينون؟ هذه الأسئلة  نزلنا بها إلى شوارع الرحاب محاولين أن نجد الإجابة.. وقد كانت بعض الإجابات صادمة ومزعجة إلى حد بعيد.

في لقاءاتنا صادفنا فئات مختلفة: الملتزم والضائع، المثقف والتافه، الجاد وغير المسؤول.. كلهم هنا في الرحاب. سعدنا بنماذج مشرفة، وصدمنا بواقع لا نتمناه أبدًا .. وبرغم أننا نبحث عن الحقيقة إلا أن فريق رحابي بالكامل كان يتمنى ألا تكون هذه هي الحقيقة.. وقد جرى الحوار بالعامية ورأينا نشره كما هو، لأنه تعبير عن الواقعية .. كما أن بعض الكلمات لا يمكن "ترجمتها" للعربية!. 


 
السوق واقف.. وكله فستك

الشاب ك.و  18 سنة, يدرس التجارة في الجامعة الأمريكية و يسكن في الرحاب منذ 10 سنوات.

ازاي تقضي يومك؟

أنزل الجامعة الصبح، لو عندي حاجة أعملها، و لو ماعنديش أفضل نايم، والليل  وقت أصحابي .. نتقابل ونخرج.

إيه نشاطاتك مع أصحابك؟

نقعد نهزر سوا.. نخرج في المعادي لأن معظم أصحابي هناك.. أو نقضيها لف بالعربيات.

وبالنسبة لنشاطاتك الشخصية؟

كنت ألعب إسكواش، وحاليًا توجهي للمزيكا، لأني ألعب "درامز" من 7 سنين ومحترف فيها، ونفسي يبقى لي مستقبل فيها، وأعزف في حفلات عالمية.

إيه رأيك في شباب الرحاب؟

فيه وفيه.. في ناس ضايعة وفي ناس "لزيزة"، بس الضايعين هم الأغلبية؛ ودول مخدرات وحشيش وخمرة، بس دلوقتي زعلانين أوي، بقى السوق واقف وكله فستك، و الناس مش طايقة بعضها.


 أذاكر بدون "إسراف" وأهلي فخورين بيّ

الشاب أ.م  21 سنة يسكن في الرحاب منذ 4 سنوات ويدرس الهندسة:

إيه رأيك في الرحاب؟

مدينة جميلة ومتكاملة وفيها كل الخدمات اللي ممكن احتاج لها.

تقضي يومك ازاي؟

إما أروح الجامعة وده نادر!! يا إما أخترع لأهلي دروس وهمية عشان أنزل مع أصحابي.

وايه طبيعة خروجاتكم؟

كافيهات أو سينما او مجرد لف في الشوارع بالعربية

والدراسه فين من كل ده؟

الدراسه شيء لابد منه.. يومين قبل الامتحان، وغير كده يبقى "إسراف"

وايه التقدير اللي بتجيبه في الاخر؟

ده يعتمد على عوامل كتيرة غير المذاكرة, غش مثلا, حظك حلو .. وواحد من المعيديين يظبطك.

ايه اهتماماتك أنت وأصحابك؟

ماليش اهتمامات غير الخروج والتهييس مع أصحابي، وانترنت تكملة السهرة بالليل, أصحابي بقى.. منهم حشيش وخمرة  ومنهم بنات ومنهم موسيقى وغنى وحفلات.. وفيه منهم من كتر الفراغ بيسرق.

يسرق ليه؟

لمجرد احساسه إنه عايز يعمل حاجة غلط ومتهورة.. هو مش محتاج، بالعكس هو أغنى من كده بكتير، وكل اللي يسرقه يرميه أو يوزعه على أصحابه.

يسرق إيه؟

أي حاجة من أي سوبر ماركت, عطور, لبس, اكسسوارات يديها لصاحبته.

إزاي تعرفت على الناس دي وإنت ابن ناس ومن عيلة محترمة؟

كلهم أصحابي من المدرسة " الانترناشيونال" وجيراني في الرحاب ومن منطقتي القديمة "مدينة نصر".

إيه الحاجات الغلط من وجه نظرك اللي بتعملها في حياتك؟

كان المفروض تسألي إيه الحاجات الصح اللي باعملها..أنا أدخن، ووقتي يضيع في حاجات أي كلام، وأعرف بنات كتير، وكنت باشرب حشيش.. بس بطلت لأنه مابقاش موجود حاليًا.

مش خايف أهلك يعرفوا؟

لأ.. من الناحية دي مطمن لأني آخد بالي من كل حاجة ومش باسيب أثر وراي, بادخن برا البيت وقبل ما أروح لازم أشتري علبة لبان علشان ريحة السجاير، وساعات أغير الـ"تي شيرت" قبل ما أطلع البيت, أوقات الخروج بيبقى لها حجج ودروس وهمية أو مذاكرة مع أصحابي، وربنا بيستر .

مش نفسك تبقى شاب أهله يفخروا به؟

ماأنا أهلي فخوريين بيَ.. أنا حأبقى مهندس قد الدنيا ومحترم مع الناس. بس مع أصحابي أبقى شخصية تانية.


الحشيش يعلي التركيز و يساعد على المذاكرة

الشاب م.ع 18 سنة يسكن في الرحاب منذ 5 سنوات.

كيف تقضي يومك؟

الجامعة, دروس, خروج مع أصدقائي, انترنت وفيس بوك.

هل تمارس رياضة معينة؟

كنت أمارس كرة السلة وحاليًا توقفت لأني كسول جدا.

ما رأيك في شباب الرحاب ؟

احنا شباب " جامد"  فيه مننا محترم وابن ناس، وفيه ناس دحاحة مالهاش في أي حاجة، وفيه ناس" فري ستايل" ودول معظمهم اللي جايين من أمريكا وأوروبا.. وفيه ناس ضايعة من كل النواحي.

الناس الضايعة دي .. ضايعة ازاي؟

فيه ناس ماشية في سكة المخدرات والحشيش ودول كتار جدا.. وفيه ناس صحوبية وبنات.. وفيه ناس جرايم وسرقة وفتوات ومشاكل.

هل لك تجربة سابقة في تلك الأشياء؟

أنا أدخن حشيش من حين لآخر، ومصاحب ومعظم وقتي في الشارع مع أصحابي.

بالنسبة للحشيش منذ متى وأنت تدخنه؟

من 3 سنوات كنا قاعدين أنا وأصحابي وواحد طلع وعزم علينا وبعد كده بقت عادة.. وشباب كتير كده.

إيه تأثيره عليك؟

هو نوع من أنواع المتعة، المحشش ده يكون عنده أحلى مزاج وكل حاجة بالنسبة له حلوة، وفيه ناس كمان بتشرب وتروح تذاكر لأنه بيعلي لها التركيز، بس ده بعد مرحلة طويلة من التعود.

أنت تعرف إنه نوع من أنواع الإدمان وله تأثير على الجهاز العصبي والاتجار فيه أو تعاطيه جريمة؟

هو مش ادمان أوي لأني أقدر استغنى عنه مش زي المخدرات، و أنا باستمتع بتأثيره على الجهاز العصبي بصراحة لأني بأنسى كل حاجة، واشوف كل حاجة حلوة و مضحكة, وهو جريمة أنا عارف وناس كتير تتمسك بس ربنا يستر .

إنت شايف اللي بتعمله صح؟ مش نفسك تتغير؟

هو أكيد مش صح بس أنا مستمتع وبأقضي وقت كويس، وأنا مبسوط كده، ممكن لو اتغيرت ماابقاش راضي.

أهلك ايه موقفهم من اللي بتعمله؟

مايعرفوش حاجة أكيد، وبالتالي مالهمش موقف, بس لو عرفوا أكيد مش هتبقى حاجة لذيذة و هتحصل مشاكل كتير .

ع. أ .. سوري، 16 سنة عايش في مصر من 15 سنة وساكن في الرحاب من سنتين.

تقضي يومك ازاي؟

عادي زي أي شاب بيقضي يومه بصحى الصبح, أمي: صباح الخير يا حبيبي أعمل لك الفطار علشان تلحق محاضراتك, أنزل أفكس للجامعة أشوف صحابي ونتسرمح في أي حتة.. أروح البيت في معاد الرجوع, أمي: شكلك تعبان أوي يا حبيبي إلحق نام ساعة على ما أحضر لك الغدا ..أتغدى وألبس وأنزل, أمي: على فين؟ رايح أذاكر مع أصحابي إنتي عارفة يا ماما الامتحانات قربت وأنا عايز أجيب تقدير علشان أفرحك يا ست الكل ...أمي: ربنا يوفقك يا حبيبي وينجح مقاصدك, بعد كده أنزل أشوف أصحابي ونشوف هنسهر فين سينما, كافيهات, نروح عند واحد صاحبنا نحشش, اللي بنلاقيه بنعمله.

إيه رأيك في شباب الرحاب؟

أنا تربية الدرّاسة, الزبالة رزعت فيا وبأحاول أنضف, شباب الرحاب يعني مخدرات زي اللبان وهم نوعين: مخدرات وبودرة وحشيش وخمرة، و فيه بقى نوع تاني مالناش دعوة بيه اللي هما كويسين ولاد ناس محترمين، يعني انا أعرف واحد يقعد معانا بنبقى فاتحينها غرزة وهو ولا حتى بيبص علينا و كون مسافرين وهوا واخد كتبه معاه ما شاء الله عليه يعني.

أهلك موافقين على اللي بتعمله؟

أنا أبويا داعية ولو عرف هيقتلني، بس هو عارف إني بأدخن و أكيد شاكك لأن الدخان بيجر لكل حاجة تانية.

إيه الفرق بين الشباب في سورية و مصر؟

الشباب في سورية لو هيحششوا بيبقى نوع الحشيش أنضف؛ " أفغاني ومغربي"، لكن في مصر دلوقتي كله" فستك وحنة", الشباب السوري ماسكين على أصلهم وعادتهم أكتر من هنا, هنا كله عايز يقلد أي حاجة يشوفها في التلفزيون ويجرب أي حاجة تيجي في سكته.

شباب ضائع
 

     شباب أستك ولبان

في مقابلة أخرى مع مجموعة شباب في الفود كورت رصدنا الآتي:

إيه رأيكم في شباب الرحاب ؟

شباب أساتك ولبان، وشباب مش نضيف, الشاب من دوول يلبس "سكيني" أحمر و أزرق, وحلق في ودنه اليمين وحلق في ودنه الشمال وخمرة وحشيش؛ ناس فاضيين هانعمل إيه يعني.. عايزين "نروق" الدماغ .

إزاي بتروقوا الدماغ زي ما بتقول؟

يعني بنروقها باللي موجود؛ حشيش قشطة.. مش هنقول لأ .. ودلوقتي "بسكوتة" مش موجود.. كله فستك.. والنص قرش بـ 70 جنيه فبلتجئي  للخمرة.

بتجيبوا الحاجات دي من فين؟

في الرحاب "ديلرز" وفي التجمع وميدان الجامع، وبالنسبة للخمرة بقى ألبير ده معروف جدا في السبع عمارات والمحبة.

بتشربوا كل يوم؟

لأ مش كل يوم, كل خميس، كل جمعة، في الحفلات والسفريات بيبقى معانا طول اليوم, ساعات في المدرسة علشان اصطباحة الصبح.

أهاليكم ماعندهمش علم أكيد عن المواضيع دي..؟

لأ .. قشطة أنا أمي عارفة إني بأشرب خمرة، لكن حشيش لأ ، علشان بتقول إنه إدمان واعتراضها الوحيد إن سني صغير, في السفريات بتبقى عارفة إني بأشرب كله, أبويا مايعرفش بس عنده شك بصراحة.

عندك علم إن الحشيش إدمان؟

لأ هو مش إدمان، لأني ممكن استغنى عنه لكن هو تعود مش أكتر .

أشرب وأشوف الناس بتلف حوليه أحسن ما أقعد فاضي

ليه بتشرب حشيش؟

علشان الفراغ, هاتي لي حاجة أعملها و أنا أبطل , أنا بأشرب حشيش دماغي تتقل فابشوف الناس حوليا بتلف وأنا بأطير، أحسن من إني أقعد فاضي ماأعملش حاجة.

هل هو ده الحل؟ ليه ماتحاولش تشغل وقتك بحاجة كويسة؟

هو مش الحل أكيد، بس احنا جربنا كل حاجة، كل واحد فينا لعب حاجة وبطلها علشان الكسل و الزهق.

مين فيكم بيصلي؟

أنا بأصلي، ولسه قبل ما آجي هنا رحت صليت المغرب  شاب آخر: أنا بأحاول بس بأكسل، ومش بتظبط معايا, واحد تاني: أنا بأحاول وإن شاء هأوصل, أنا مبطل بقالي اسبوعين ودلوقتي باخد دروس دين علشان التزم . شاب آخر: و الله نفسي أبطل ومستعد جدا بس تيجي" وزة" حلوة تقول لي وتقول لي.

حديقة الـ GUC

مين فيكم " مصاحب"؟

ياريت والله، أنا نفسي علشان أبطل، أخويا جات له واحدة ظبطته، دلوقتي مابيحطش سجارة في بقه, شاب تاني: أنا ماأعرفش أركز في حاجتين كفاية علي الحشيش دي أحلى دماغ ...بعدين كل اللي بيصاحب دلوقتي بيبقى علشان حاجة واحدة بلاش نتكلم فيها سفالة و قلة أدب, دلوقتي جنينة الـ GUC جنينة حمرة من الآخر، الواحد من دول يروح يسأل بس إنتي أخرك كام؟!

البنات ضايعيين أكثر من الولاد

إيه رأيكم في بنات الرحاب؟

يالهوي.. مبدأيا بيحبوا يبينوا.. وبيجروا ورا الواد البلوند، لكن المحترم دهم قرف بالنسبة لهم , وبالمناسبة بقى.. البنات بتشرب أكتر من الولاد ومعاهم فلوس أكتر من الولاد.. و يقدروا يجيبوا كل حاجة، و هي اللي تطلب مني إني أسكرها.. بالذات الصغيرين دوول مصيبة .

نعرف ان الخناقات منتشرة بينكم ..  إيه أسبابها؟

الخناقات دي فراغ وملل, يعني مثلا ييجوا الشباب بتوع التجمع"الحبسجية" يرخموا على الشاب الحليوة بتاع الرحاب يجروا شكله, هب خناقة, ويا سلام بقى لو عامل دماغ بتبقى أحلى حاجة، ما أنت بتضرب ومش حاسس بقى, بس بتصحى ماتعرفش نفسك لما تبص في المرايه.

امتى هنتغير؟

والله طول ماأنا مبسوط وشايف الدنيا حلوة مش هاتغير، وكمان أنا ماباتعبش في أي حاجة بأعملها؛ كله بييجي لحد عندي، ومش بتاخد مجهود مني, رأي آخر: بصراحة أنا أهلي نفسهم إني أتغير بس هم كانوا فين من زمان؟ جايين يفتكروا بعد ما ضعت خلاص؟.. اللي اتعود على حاجة صعب يغيرها.

شاب آخر : أنا هاتغير السنة اللي جاية غصب عني علشان نفسي أدخل طيران وده حلم حياتي.

الوجه الآخر لشباب الرحاب

النماذج السابقة لا تمثل - لحسن الحظ - كل شباب الرحاب، فهناك نماذج مختلفة، منها عبد الرحمن محمد, 15 سنة، يمارس رياضة كرة السلة منذ أن كان سنه 3 سنوات.

عبد الرحمن محمد

كيف بدأ الأمر ..كانت موهبة أم هواية؟

في البداية كانت أمي حريصة على أن يكون لي رياضة، ومنذ أن كنت في الثالثة قامت بأخذي للنادي وجربت كل أنواع الرياضات، وكرة السلة هي التي توقفت عندها وهنا ايقنت أنها ستكون رياضتي واشتركت بها في نادي الزمالك وبدأت أتدرج من" ميكرو" إلى ميني ثم إلى مستوى "15"  حاليًا.

ما أهمية الرياضة في حياتك وهل تشغلك عن الدراسة؟

من أولى أولوياتي، فهي أجمل طريقة أستطيع تفريغ طاقتي بها، وهي تنمي العقل والجسم بطريقة صحية وأشغل بها وقت فراغي بدلاً من اللجوء لطرق غير سليمة, ومع تنظيم الوقت لا أجد صعوبة أو تعطيل عن الدراسة؛ بالعكس الدراسة تكون ميسرة جدًا بعد ممارسة الرياضة فهي تعلي القدرة على التركيز.

ما الطرق الخاطئة التي ترى شباب الرحاب يتجه إليها؟

بعضهم يدخن, الآخر يتسكع طوال اليوم أمام المولات, القيادة في الشوارع بدون رخصة, معاكسة البنات, بلاي ستيشن وانترنت بالساعات.

كيف ترى شباب الرحاب؟

55% منهم محترمين ومتفوقين دراسيا ومتدينين و تضم فئة الشباب المصري وفئة كبيرة ممن كانوا خارج مصر من "أمريكا و أوروبا "، و 45%  عكس ذلك.

كيف تقضي يومك كرحابي؟

كالعادة، المدرسة في الصباح، بعد ذلك أتمرن في النادي ثم يأتي وقت الدراسة وبينها أصلي كل فرض في الجامع، وفي نهاية الأسبوع لي جانب ترفيهي سواء مع أصدقائي أو رحلات تبع النادي.  


ومثله أيضًا، كمال الدين محمد مقيم في مدينة الرحاب، ويدرس طب الأسنان في جامعة عين شمس وهو بطل ملاكمة وفي نفس الوقت يعمل مع والده.

كمال الدين محمد

منذ متى وأنت في الرحاب وما رأيك فيها؟

أنا أعيش هنا منذ 2003 وقبل ذلك كنت أعيش في اليونان مع عائلتي ... الرحاب مدينة جميلة وتتمتع بهدوء غير متوفر في باقي الأحياء المصرية ومدينة متكاملة وهي تلائمني، فجوها أشبه بجو أثينا التي قضيت معظم حياتي فيها.

الجانب الرياضي والملاكمة في حياتك:

الرياضة تشكل جزءًا كبيرًا من حياتي، ولقد كان توجهي نحو عدة رياضات في الماضي" تنس, سباحة, كرة قدم" ولكن لم أجد نفسي غير في الملاكمة، وأنا أمارسها منذ 7 سنوات وفي نادي الرحاب منذ 2005 , وبجانب الملاكمة أمارس المشي بمعدل ساعة ونصف ساعة كل يوم وبعض تمرينات " الفتنس" (اللياقة البدنية) يوميًا.

بجانب دراستك وممارستك للرياضة فأنت تعمل أيضًا, ما طبيعة عملك؟

حاليا أن المسؤول عن مصنع والدي وأعمل فيه كرئيس المصممين، فنحن نصمم أشكال وموديلات النعل الخاص بالأحذية, وقبل ذلك كنت أعمل في شركة " ميكروسوفت"  " call center" للرد على الاتصالات من اليونان.

كيف تستطيع التوفيق بين شغلك ودراستك وممارستك للرياضة؟

الأمر صعب في الواقع,فأنا أعمل بمعدل 8 ساعات يوميًا، وألجأ للدروس  الخصوصية وأحاول تلخيص المعلومات والتركيز في كل ما يقال لأني من النوع السمعي، و في فترة الامتحانات أتوقف عن الذهاب لتمرين الملاكمة وأحاول تخفيف ساعات العمل لأتفرغ للدراسة.

كيف تقضي يومك؟

يومي محصور بين الجامعة والعمل ورياضتي، وبالرغم من ذلك فالجانب الديني والصلاة أولى أولوياتي، فأنا مؤمن أن وجود اتصال مع الله هو أكبر أسباب التوفيق والنجاح.

يقال إن شباب الرحاب شباب تافه وبلا هدف أو طموح؟ ما رأيك ؟

للأسف، نسبة كبيرة من شباب الرحاب ضائعين بمعنى الكلمة، و السبب من وجه نظري هو انجرافهم وراء التيار بدون تفكير , فالأمر إذا أخذ منهم دقيقة تفكير في العواقب من المؤكد الأمر سيختلف, كذلك عدم الشعور بالمسؤولية عامل مهم، وعدم وجود وسيلة لملأ وقت الفراغ بطريقة هادفة من أكبر الأسباب, فمعظم الشباب هنا اهتماماتهم محصورة حول المكيفات والمسكرات وهذه كارثة!

ما النصيحة التي توجهها لكل شاب في مثل سنك؟

مبدئيًا، أهم شئ القرب من الله ومن الدين وهو شئ لم يكن بداخلي لفترة كبيرة بحكم طبيعة حياتي في أوروبا, يجب أن يجد كل إنسان صلة مع الله أيا كان توجهه فهو مصدر الهام وبه تشعر أن هناك خالقًا رحيمًا ينظر إليك من أعلى ويلهمك ويوجهك نحو طريق الخير.

ثانيًا: " لازم يشغلوا مخهم " من المؤكد أن هذا المخ لم يخلق عبثًا، وكل إنسان خلق لمهمة ولسبب ما ليساهم في تناسق وانسجام الكون.

ثالثًا: الرياضة التي اعتبرها وسيلة تصريف لكل الطاقة السلبية التي أشحن بها خلال اليوم.

الغالبية للمحترمين الملتزمين

محمد هشام 22 سنة, طالب بكلية التجارة ويسكن في الرحاب منذ  5 سنوات.

كيف تقضي يومك؟

بداية اليوم في الجامعة وبعد ذلك العمل وباقي اليوم أقضيه مع أصدقائي خارج المنزل .

ما طبيعة عملك؟

أعمل في شركة دعاية وإعلام بجانب إني ملحن وعازف جيتار .

ما رأيك في شباب الرحاب؟

شباب الرحاب منهم الجيد والعملي الذي يتحمل المسؤولية، ومنهم التافه الذي يقضي وقته عند المول والفود كورت؛ وقد عشت فترة من حياتي معهم ويومهم كالآتي: نتقابل الساعة 6 عند المول لحد الساعة 4 الفجر بقعد نهزر مع بعض ونعاكس البنات، ودول الناس اللي عندهم فراغ  ومش بيعملوا حاجة في حياتهم  وهم قلة وليس كل شباب الرحاب هكذا لأن معظمهم لا يتواجدون في الرحاب طول الوقت والغالبية الأكثر للشباب المحترم الذي يعمل وملتزم وقريب من الله ومرتبطين ارتباط جدي.

ما سبب تغييرك وتركك لمجاميع الشباب التافه؟

أفكاري وآرائي مختلفة عنهم، والسبب في معرفتي بهم أنني عندما انتقلت للحياة هنا لم يكن لي معارف أو أصدقاء وكنت بحاجة للتعرف على الناس فكانوا هم أول من اختلط بهم، وبعد ذلك لم نتوافق لأنهم أشخاص تافهين لا هدف لهم، وكل الأشياء تتكرر كل يوم. توقفت عن الجلوس معهم وأصبح لي توجه آخر غيرهم وقابلت شباب آخر.

د.صلاح عبد المتعال

ضحايا أم مجرمون؟

يعلق الأستاذ الدكتور صلاح عبد المتعال أستاذ علم الاجتماع بالمركز القومي للبحوث الاجتماعية والجنائية على قضية الشباب واتجهاتهم السلبية قائلا :إن سلبية الشباب التي فاقت كل الحدود تجعلنا حائرين، هل هم مخطئون يجب اتخاذ رد فعل حاسم وفعال معهم أم أنهم ضحية إهمال تربوي واجتماعي يستوجب التعاطف معهم؟ ويضيف: الشباب من المفترض أنهم أصل المجتمع وفئة لا تنفصل عنه جزئيا أو كليا, ولكن في الواقع نرى العكس؛ حيث أنهم مهمشون اجتماعيًا وسياسيًا، لا إرادة ولا دور لهم ولا يشاركون بآرائهم، هذا يحدث في المجتمع وفي الأسرة، لهذا اعتادوا على عدم تحمل المسؤولية، ويرى الدكتور عبد المتعال أن: "الحل من وجهة نظري هو في إعداد شامل؛ تربويا، تعليميا، دينيا وثقافيا, وتحديد أهداف لهم. أعتقد أن أصابع الاتهام والمسؤولية في هذه المشكلة توجه للدولة والمجتمع أكثر منها للأسرة

طالع أيضا

بنات الرحاب .. كيف تعيش حياتها؟

  • شاهد تعليقات موقع رحابي.نت

    تعليقات الفيسبوك



    أخبار وموضوعات ذات صلة

    الرحاب على الفيس بوك.. حصاد الأسبوع  12 يونيو

    نشر العضو نبيل عرفة خبراً عن مشاجرة تمت في أحد مساجد الرحاب عقب صلاة الجمعة، حيث قال: الإخوة والأخوات سكان مدينة الرحاب المحترمين، بعد صلاة الجمعة اليوم 8/6 حدثت خناقة كبيرة وصلت إلى التعدي بالضرب داخل المسجد لأن خطيب المسجد كانت تصب خطبته لصالح مرشح بعينه.. فأرجوا تعليقكم على ذلك، وتعليقي أنا الشخصي هذا لايجوز لأن منبر المسجد انحرف… بقية الخبر ←

    انقلاب سيارة أمام مول 1

    في الساعة السابعة والنصف من صباح اليوم انحرفت سيارة ملاكي يقودها شاب في منطقة الانتظار عند مول (1) بمدينة الرحاب، وانقلبت رأسا على عقب.
    وعلمت شبكة " رحابي . نت" من شهود العيان أن الشاب الذي كان يقود السيارة خرج منها سليمًا، وبعد الحادث مباشرة ترك السيارة وأعطى مفتاح السيارة لرجل الأمن واتصل بوالدته ليخبرها بالحادث وتوجه مسرعا للحاق بالامتحان.

    بقية الخبر ←

    مسيرة بالرحاب .. لا للفلول

    نظم شباب مدينة الرحاب بالتعاون مع إخوان الرحاب وأعضاء الحملات الانتخابية لجميع مرشحي انتخابات الرئاسة عصر أمس الجمعة 8/6/2012 مسيرة تحت عنوان " لا للفلول ". تحركت المسيرة في تمام الساعة الخامسة مساءًا من أمام مسجد طلعت مصطفى بالمرحلة الرابعة، وسارت في شوارع الرحاب مرورًا بالمدرسة الفرنسية ونادي الرحاب وصولا إلى منطقة المطاعم. حمل المشاركون لافتات، ورددوا هتافات تندد بالفلول الممثلين… بقية الخبر ←

    سرقة شقة وسيارة بالمرحلة الرابعة

    بعد منتصف ليل الخميس الماضي 31 مايو، استيقظ سكان شقة بعقار مطل علي الشارع الرئيسي بالمجموعة (73) بمدينة الرحاب ليجدوا شباك المطبخ الذي يطل علي المنور الداخلي مفتوحًا، وقد اختفت جميع الهواتف المحمولة الخاصة بالأسرة، وهي ثلاثة هواتف حديثة، وكذلك مبالغ من النقود ومفاتيح سيارة ورخصة قيادة السيارة، والتي كانت موضوعة علي منضدة بحجرة الاستقبال.
    وقد خرج اللص أو اللصوص… بقية الخبر ←

    الوسوم