منتديات رحابي.نت

 سبق لي نشر الاقتراح ده كرد على موضوع
http://www.rehaby.net/forum_view_topic.php?page=2&id=46&cat=10&subcat=25
 
بس يبدو إن كتير من الأعضاء ما انتبهوش له، عشان كدة قررت أنزل في موضوع لوحده
 
————————————————————————————————————————————-
 
أفتكر إن في رمضان اللي فات، جمعية من الجمعيات الخيرية حطت كشك جنب المول الأول كانت بتتلقى فيه الهدوم القديمة. وده طبعاً حل مثالي لو أمكن يتعمل طول السنة. في الدول المتقدمة اللي بيحصل فيها Recycling  بيتحط في كل حي container للهدوم والجزم و container تاني للأزايز (الزجاجات) و container ثالث للبلاستيكيات. وبيتم تفريغهم  بشكل دوري وفي مواعيد كل سكان الحي عارفاهم.
 
إحنا بقى في مصر بيحصل برضه عندنا فصل للقمامة وبيحصل ريسايكلنج برضه، بس طبعاً مش من المنبع، كل ده بيحصل في مقالب الزبالة.
 
المهم .. بعيداً عن الكلام الكتير .. أنا بأقترح الاقتراح التالي:
يتم تخصيص يوم ثابت كل شهر أو شهرين .. كل الناس تجمّع فيه الهدوم اللي عايزة تتبرع بيها وتجهزها في اكياس جنب باب الشقة، موقع رحابي مشكوراً وبالتنسيق مع جهاز المدينة، يتفق مع أحد الجمعيات الخيرية، تيجي الجمعية دي بعربية نص نقل، وتعدي على بيوت الأعضاء اللي قالوا إن عندهم هدوم للتبرع، ويخبطوا ع الباب، وياخدوا اكياس الهدوم .. عملية مش هتاخد أكتر من 20 ثانية .. واللي مش هيبقى موجود في البيت .. يقدر يسيب الكيس قدام الباب، غالباً بتوع الزبالة بيعدوا بعد الفجر، وما حدش هياخد الكيس لو طلع بعد كدة.
 
بيتهيألي الفكرة دي لو تمت، هتفرق كتير قوي، في اعتقادي إن الرحاب فيها هدوم مستعملة تكفي سكان عشوائيات القاهرة الكبرى كلها.
 
والكلام مش ع الهدوم وبس، عندنا الأزايز البلاستيك، والبرطمانات الإزاز، والورق، بس يا ريت يبقى فيه تخصص .. يعني المعاد الفلاني للهدوم وبس، الشهر اللي بعده يكون للزجاجيات وبس، والشهر اللي بعده يكون للورق وبس.
 
أتمنى إن الاقتراح ده يلقى قبول، ولو حد عنده فكرة أحسن، أو عنده تعديل أو تطوير للفكرة يا ريت ما يحرمناش منها.
 
وإذا الفكرة عجبت الكل، إيه رأيكم نبدأها مثلاً يوم 1 فبراير اللي جاي ؟

السلام عليكم أخي  بن عثمان
الحقيقة الأقتراح رائع خصوصا انه سوف يكون خطوة ايجابية جيدة لموقع رحابي
وانا كنت بعمل كده فعلا وباتصل بجمعية رسالة ييجوا ياخدوا الحاجات
وممكن الأقتراح ده يعمم يعني ادارة المنتدى تتفق مع الجمعية بحيث تمر مثلا كل أول جمعة من كل شهر على المشتركين
لكن طبعا في بعض الصعوبه في التعرف على أماكن المشتركين خصوصا ان المشتركين في المنتدى  عددهم مش كبير بالنسبة لسكان الرحاب
عشان كده اقتراح المساجد جيد يعني ممكن المشتركين يجمعوا الملابس والأشياء في كونتينرز عند كل مسجد وفي الحالة دي من السهل على السيارة المرور وتجميعها
شكرا وتحياتي

 أنا هحاول إن شاء الله أتكلم مع إمام المسجد وربنا يسهل، أكيد هيرجع للجهاز في الموضوع ده. بس في حالة إن الموضوع ما اتنفذش بيتهيألي إن معرفة أماكن المتبرعين مش مشكلة كبيرة، ممكن يتم تنظيمها بشكل ما عن طريق الموقع.