منتديات رحابي.نت

 
( عايز تعيش )
 
 
قلبك حزين .. عايز تعيش
والروح بتتفتت ألم
والكف متحنى بندم ..
والحلم ع الأبواب يطيش
بحر الجراح مابينتهيش
كل الطرق مالهاش رجوع
وعنيك بتتمنى الدموع
بس الدموع دايما مفيش .. دايما مفيش
 
عايز تعيش ..
طالت ليالى المشكله
والعتمه تور
والحل متكسر هناك فوق الجسور
وأمل وحيد فوق الجفون
مستنى يطرح ع الغصون ..
حبة فرح
والفجر من عندك سرح
بينك وبينه ألف سور
عايز تثور
تصرخ بصوتك ماتلاقيش
 
عايز تعيش ..
لكن تقيله خطوتك
والسكه دى مش سكتك
والريح بتتشطر عليك..
وترجعك
كل إما تسبق خطوتين
وبتدفعك
لجل إما تقفل ع الحنين
وبتمنعك
توصل على أول طريق
قلبك برئ
والوقت فات
عايز تطير
بس الجناح عندك هزيل
ومفيهش ريش
 
عايز تعيش ..
ضايع خلاص .. كل اللى كان تقدر عليه
إيه جابنى إيه .. ضيعنى إيه ؟
مليون سؤال مابينتهيش ..
والرد مش عندك هنا
الرد موجود فى السما ..
عند الإله
يارب محتاج لك أنا
يارب محتاج لك أنا
يارب محتاج لك أنا
تهدى القلوب التعبانبن
وطريق يوصل للمنى
مايهدنيش
إنت الملاذ
وانت الحبيب
وإنت الرجا
يارب محتاج لك أنا
تايب اليك ماتردنيش
غير سكتك ماتمشنيش
مش عايز أعيش ..
إلا فى جنة رحمتك
دايما معاك
أنا كلى من غيرك مفيش ..
إنت الإله غيرك ماليش
عايز أعيش  

ما شاء الله كلماات جميله جداا اخى 
 
استمر  وجميل اوى الجزأ الى بتناجى فيه ربنا سبحانه وتعالى
 
بارك الله فيك 

أشكرك يا أستاذه .. ربنا يخليكى
مليش جمهور هنا غيرك

العفو اخى  تسلم
 
 هههههههه الجمهور هنا موجود والله  طالما فيه حركه فى السايت هتلاقيه بيظهر واحده واحده
مش تقلق :D

ولا يهمك انتى .. ردك بميت رد عندى 
 
وتشجيعك كفايه .. ربنا يخليكى يا أستاذه