على اسم مصر يقول التاريخ ماشاء
دي مصر عندي أحب و أجمل الاشياء " صلاح جاهين"
مين هي مصر ؟!
ده سؤال نساله واحنا اللي نجاوب عليه .. وبعد ما نجاوب نقدر نحدد احنا بنكره مصر ولا بنحبها
مصر مش هي الحكومة ولا الريس ولا الاحزاب ولاالناس اللي معاها فلوس كثير وعيزه تجيب اكتر ..
مصر هي الصحيان بدري و الشمس لسة بتفتح عنيها و النور بيتسرسب من الشيش و اذعة القران الكريم
طلعة من الراديو ..
هي عربية الفول اللي الناس ملمومين عليها و بياكلو بمزاج قوي في احلى اصطباحة ، كبايه الشاي بالحليب على قهوه بلدي الساعه 7 الصبح .
و الواد اللي سايق عجلة وشايل طولة العيش الساخن اللي لسة طالع من الفرن ورحته بتلعب في نخشيشك ..
وعم سعيد بيفتح الدكان و بيرش ميه قدامه وبردضه اذاعة القران الكريم شغاله عنده و " في بقعة من بقاع الارض طاهرة "
و البنت ام مريله كحلي اللي منير وجهين شفوها وهي رايحة المدرسة و العيال الصغيره الي شنطة المدرسه قاطمه ضهرهم وهم متكتفين جوا المريله البني ام زراير من ورا ( بقوا يلبسوا قمصان دلوقتي ) وبرضه بيجروا ورا بعض و عملين دوشه و تحية العلم .
مصر هي الاتنين الشباب الاصحاب قوي اللي ماشين ع الكورنيش في عز الشتا ومستخبيين جوه الهدوم التقيله و بقهم بيطلع بخار م السقعة بس واحد فيهم مطلع ايده م الجاكت و ماسك السيجارة .
مصر هي الرجاله الكبار اللي قعدين يفتكروا ايام زمان الحلوة ويضحكوا ضحكه ترج النجم على راى الابنودي
و ام امين بتاعة الخضار الى قعدة ع النصيه من و انا في ابتدائي .
و الشارع الفاضي باليل اللي مية الشتا بتلمع عليه و عسكري المرور الواقف ف الشارع من زمان قوي .
مصر هي كل البيوت اللي فتحة على بعضها و بتحب بعضها من غير مصلحة .
كل فرح عديت عليه ودخلت بركت و انت مش عارف اسم العريس و كل عزا دخلته وعملت الواجب فيه مع انك عمرك ما شوفت اللي مات .
مصر هي كبايه الشاي بالنعناع و انت لابس الجلبيه الصيفي و قاعد في البلكونه مع نسمه بتهفهف بعد ما اكلت اكله محشي من ايد الولدة و بنفسها وحليت بشقتين بطيخ ساقعين في عزالصيف .
مصر سيد درويش وشد الحزام على وسطك و ام كلثوم بالليل وعبد الحليم لما تحب و منيب و ام العيال العشرية و منير وهو بيصرخ
( يا مصر و انتي الحبيبه .. انتي اغترابي و شقايا
ونتي الجراح الرهيبه .. و انتي الي عندك دوايا )
مصر هي " مولاي اني ببابك قد بسط يدي " الي عايش بيها النقشبندي لحد دلوقتي وصوت محمد رفعت بيقرا قبل الفطار ف رمضان و الشيخ الشعراوي اللي بتزعل اول ميقول ( و الى لقاء قادم ان شاء الله )
مصر الابنودي وصلاح جاهين و فؤاد نجم و الشيخ امام و فاروق جويده و هيكل فهمي هويدى و الشيخ الغزالي فى صلاة العيد و كل الناس الي بتصلي ورا محمد جبريل في دعوة الحق و باقي الناس الي ورا الشيخ حاتم في التهجد في القائد ابراهيم وعبد الوهاب مطاوع ف اهرام الجمعة و كركتير احمد رجب .
مصر و ريحة الكبدة و امك بتعملها عشان تفطر اول يومالعيد بعد م تخلص دبح .
و الصيدين الي وقفين على البحر صيف شتا بينغشو السمك ..
و سواق التكس اللي بتركب معاه وبيحكيلك عن مشكله مع انك عمرك مشفته قبل كدة ولا هاتشوفه بعد كده
و الواد علي الي بيعدي عم جرجس الشارع وهو خايف عليه من العربيات و الست الي بتفاصل مع بتاع الخضار علي شلن زياده في الطماطم
مصر السفر و السهر و الشقا و العشق و المعشوق
مصر الي عمنا بيرم قال عنها
" بلدنا دي زي الرصيف ... وعيز يتكنس
فيه ناس بتعرق ع الرغيف ... وناس بتعرق م التنس "
هي دى مصر و اللي ما شفهاش كده و ماشفش فيها كل ده ممكن ميحبهاش
بس اللي شاف ده و محبهاش لازم يراجع نفسه
ينسى الناس اللي تاعبه و تاعبه البلد و يفتكر البلد نفسها
البلد الي منير قلها
وحب اغترابي ف صبحك و ليلك .... وحب الونس بالرفاقة يا مصر
تنام الدموع ف العيون الهواجع .... تسهر دموعي ف حبك يا مصر
تهون الظنون و الشجون و المواجع ... اكدب ظنوني في حبك يا مصر
ها قرب و اقرب و مش ممكن اهرب .... وتنزل دموعي على خدودي تشرب
تلاقي الرموش و الخدود و المباسم مراسم .... وصورتك عليهم يا مصر
